Эдэр суруйааччылар XXI өрөспүүбүлүкэтээҕи сүбэ мунньахтара
Кулун тутан 26-28 күннэригэр Дьокуускай куоракка Эдэр суруйааччылар XXI өрөспүүбүлүкэтээҕи сүбэ мунньахтара ыытыллыаҕа. Бүгүҥҥүттэн сүбэ мунньахха кыттыан баҕалаах айар дьоҕурдаах эдэр дьонтон үлэлэрин тутуу саҕаланна.
Мунньахха кыттарга эдэр дьон икки түһүмэҕи ааһыахтара. Ол курдук, тэрийэр бөлөх олунньу 14 күнүттэн кулун тутар 2 күнүгэр диэри бастакы түһүмэҕи, кэтэхтэн куонкуруһу, ыытыаҕа. Бу түһүмэххэ 18-40 саастарыгар диэри (кириитикэттэн, төрүт олохтоох аҕыйах ахсааннаах норуоттар литератураларыттан ураты) ким баҕалаах кыттар.
Тэрийэр бөлөх поэзияҕа, прозаҕа, драмаҕа, кириитикэҕэ, нуучча, төрүт олохтоох аҕыйах ахсааннаах норуоттар литератураларыгар айымньылары тутуоҕа. Кыттыан баҕалаахтар айымньыларгытын уонна кылгас биографияҕытын (манна ааккыт-суолгут, сааскыт, ханна олороргут, үлэлииргит, үөрэнэргит, төлөпүөҥҥүт булгуччу ыйыллар) бүгүҥҥүттэн саҕалаан ederlit@mail.ru электроннай почтаҕа ыытыҥ. Драмаҕа уонна аҕыйах ахсааннаах норуоттар литератураларыгар саастарынан хааччаҕа суох, кыттыан баҕалаахтартан айымньылара уонна сайаапкалара эрэ ирдэниллэр, сүүмэрдээһин ыытыллыбат.
Айымньыны ыытыы усулуобуйата:
— Поэзияҕа (5-10 талыллыбыт хоһоон);
— Прозаҕа (1-3 талыллыбыт кэпсээн эбэтэр проза атын жанырдара);
— Драмаҕа (биир эбэтэр онтон элбэх айымньы);
— Литературнай кириитикэҕэ (биир эбэтэр онтон элбэх айымньы).
Кэтэхтэн куонкурус түмүгэ кулун тутар 7 күнүгэр тахсыаҕа. Хас биирдии кыттааччыга анал сурук барыаҕа. Манна сүүмэрдэммиттэр кулун тутар 26-28 күннэригэр Сүбэ мунньахха кыттыахтара. Мунньах бырагырааматын чэрчитинэн, эдэрдэр ханнык секцияны талбыттарынан, поэзияҕа, прозаҕа, драмаҕа, кириитикэҕэ, нуучча уонна төрүт олохтоох аҕыйах ахсааннаах норуоттар литератураларыгар, үөрэниэхтэрэ, айымньыларын ырыттарыахтара.
Секциялары Саха сирин биллиилээх суруйааччылара, литературоведтара иилээн-саҕалаан ыытыахтара. Сүбэ мунньах түмүгүнэн хас биирдии кыттааччы туоһу суругу тутуоҕа, чаҕылхайдар хаһыаттарга, сурунаалларга бэчээттэнэргэ мэктиэлэниэхтэрэ. Оттон уһулуччу айымньылар анал хомуурунньукка, туспа кинигэнэн бэчээттэнэн тахсыахтара.
Ыспыраапка: Эдэр суруйааччылар сүбэ мунньахтара Саха сирин суруйааччыларын сойууһун көҕүлээһининэн, 2004 с. сөргүтүллэн ыытыллар. Билигин СӨ култуураҕа уонна духуобунай сайдыытыгар, ыччат дьыалаларыгар уонна дьиэ кэргэн бэлиитикэтигэр министиэристибэлэрин, Саха сирин суруйааччыларын ассоциацията кыттыылаах барар. Сүбэ мунньах түмүгүнэн хас да ааптар Россия суруйааччылар сойууһугар мэктиэлэнэн киирдэ.
