Литературная Якутия


 
21.03.2016
Мария САННИКОВА,
сурунаал эппиэт сэкирэтээрэ

«Күрүлгэн» — Кыргызcтан электроннай библиотекатыгар

Күрүлгэн №3-2012

Биһиги кэммит улуу суруйааччыта Чыҥгыз Айтматов (1928-2008) кэриэһигэр анаммыт «Новая литература Кыргызcтана» («Кыргызcтандын жаҥы адабияты») диэн электроннай библиотека саайтыгар «Күрүлгэн» уус-уран сурунаал 2012 сыллаахха бэчээттэммит икки нүөмэрин туһунан билиһиннэрии таҕыста.

Чуолаан, ити икки нүөмэргэ Чыҥгыз Айтматов «Белое облако Чингисхана» диэн айымньытын сахалыы тылбааһа бэчээттэммитэ. Тылбаасчыт — Т.С. Кириллин-Күндүмэн, СӨ үөрэҕин үтүөлээх үлэһитэ, Сунтаар Кутанатыгар баар Күндэ түмэлин төрүттээччитэ.

Трофим Семёнович тылбааһын туһунан кини Тойбохой орто оскуолатыгар саха тылыгар уһуйбут үөрэнээччитэ, «Күрүлгэн» сурунаал бас дьаһабыла Афанасий Гуринов-Арчылан «Аахпыт кэннэ» диэн ааттаан бэйэтин санаатын суруйбута нууччалыы тылбаастанан электроннай библиотека «Кириитикэ уонна литературоведение» диэн салаатыгар киирдэ: http://www.literatura.kg/main/.

Ытыктабыллаах ааҕааччылар, бу күннэргэ 2016 сыл бастакы аҥаарыгар сурутуу хампаанньата бара турарын санатабыт. Арассыыйа Федерациятын Сибээскэ уонна маассабай коммуникацияҕа министиэристибэтин быһаарыытынан социальнай суолталаах хаһыат-сурунаал испииһэгэр киллэриллибит «Күрүлгэн» сурунаал ити хампаанньа түмүгүнэн 5 тыһыынчалаах кирбиини куоһарар түбэлтэтигэр, «Арассыыйа почтата» ФГУТ сурутууга 15%-наах чэпчэтиини көрүөҕэ, ол сурунаал кэскиллээх үлэтигэр улахан өйөбүл буолуоҕа.