Литературная Якутия


 
22.04.2022
 
Надежда ЕГОРОВА,
«Саха сирэ» хаһыат

Ойуунускайга аналлаах документальнай киинэ сүрэхтэннэ

Муус устар 19 күнүгэр «Киин» киинэ тыйаатырга «Платон Ойунский. Сокровенная история» документальнай киинэ сүрэхтэннэ.

 

Cаха АССР 100 сылыгар аналлаах киинэни билиһиннэриигэ өрөспүүбүлүкэ судаарыстыбаннай сүбэһитэ Андрей Борисов, СӨ култуураҕа уонна духуобунай сайдыыга миниистирин бастакы солбуйааччы Владислав Левочкин кытыннылар.

Документальнай киинэ саха уһулуччулаах уола Платон Алексеевич Ойуунускай олоҕор ананар. Көрөөччү киинэ устата үс бэлиэлээх өйдөбүнньүк – Олоҥхо, Таатта (Табахыров) уонна Ойуунускай ыллыгынан айанныыр.

— Былатыан Ойуунускай аата биһиги өрөспүүбүлүкэбит хас биирдии олохтооҕор улахан суолталаах. Биһиги «Саха» НКиК улахан үлэни оҥорбутугар махтанабыт. Саха сирин төрүттэспит дьоммут туһунан маннык киинэлэри элбэхтик устуохха наада. Бу киинэ телевидениеҕэ эрэ буолбакка, үлэ кэлэктииптэригэр, оскуолаларга, ордук бырааһынньык күннэригэр, көрдөрүллүөҕэр эрэнэбит. Киинэ нууччалыы тыллаах буолан, элбэх киһи көрөр уонна дьоһуннаахтык сыаналыыр кыахтаах. Хайыы үйэ бырамыысыланнай оройуоннар уонна өрөспүүбүлүкэ улуустара ыйытан эрэллэр», — диэн Владислав Левочкин бэлиэтээтэ. Кини киинэ сценарийын ааптара Евдокия Избековаҕа уонна режиссер Галина Раевскаяҕа министиэристибэ махтал суруктарын туттарда.

 

Хартыына режиссера — Галина Раевская, сценарий ааптара – Евдокия Избекова, туруорааччы-оператор – Илья Жараев, оператордар – Александр Жуков, Нюргуна Избекова, звукорежиссер – Данила Еремеев. Тылбаасчыт – Альбина Борисова. Оруоллары толордулар: Платон Ойуунускай — Роман Дорофеев, Иван Табаахырап — Петр Максимович Тихонов, Максим Аммосов — Вячеслав Лавернов, Емельян Ярославскай — Павел Танин. Диктор – Кирилл Семенов.

Источник: «Эдэр саас»