Аммаҕа мелодист Дмитрий Емельяновка аналлаах өрөспүүбүлүкэтээҕи күрэс ыытылынна
Аммаҕа элбэх ырыалар ааптардара, толорооччу Дмитрий Емельянов төрөөбүтэ 65 сылыгар анаммыт гитаранан ырыа өрөспүүбүлүкэтээҕи күрэһэ ыытылынна.
Аммаҕа ыытыллыбыт ырыа күрэһин кыайыылаахтарын Инстаграм сирэйигэр үөрүүлээх быһыыга-майгыга биллэрдилэр. Манна «Ааспыт кэм ахтылҕанын» көрөн аастылар, мелодист, ырыаһыт Дмитрий Емельянов чугас дьонун истиҥ иһирэх ахтыыларын, ырыаһыты санатар ырыалары иһиттилэр. Ураты ньыманан буолан ааспыт күрэскэ олохтоохтору таһынан Дьокуускай куораттан, Нерюнгриттан, Алдантан, Сунтаартан, Үөһээ Бүлүүттэн, Уус Алдантан, Намтан, Мэҥэ Хаҥаластан, Чурапчыттан барыта 48 толорооччу кытынна.
Өрөспүүбүлүкэҕэ киэҥник биллэр мелодист, толорооччу, артыыс Алексей Егоров-Өркөн бэрэссэдээтэллээх дьүүллүүр сүбэҕэ джазмен, пианист, музыкант, композитор, артыыс Егор Ефимов, улуус култуураҕа уонна норуот айымньытын салалтатын исписэлииһэ Ольга Судинова, Амматааҕы лицей учуутала, олохтоох ааптар Наталия Рязанская, Дмитрий Емельянов кыыһа Оксана Емельянова үлэлээтилэр.
Үгүс кыттааччыттан улахан сүүмэрдээһин түмүгүнэн кылаан кыайыылааҕынан Үөһээ Бүлүүттэн Юрий Михайлов ааттанна. 1 истиэпэннээх лауреатынан Уус Алдан Эһэлээҕиттэн Владислав Лукачевскай, 2 истиэпэннээх лауреатынан Амматтан Руслан Варфоломеев, 3 истиэпэннээх лауреатынан Үөһээ Бүлүүттэн Юрий Васильев, 1 истиэпэннээх дипломанынан Үөһээ Бүлүүттэн Ньургун Николаев, 2 истиэпэннээх дипломанынан Үөһээ Бүлүүттэн Евгений Тихонов, 3 истиэпэннээх дипломанынан Сатаҕайтан Павел Давыдов буоллулар. Анал ааттар кыайыылаахтарынан «Көрөөччүлэр биһирэбиллэрин» Намтан Николай Протопопов, «Дмитрий Емельянов ырыатын бастыҥ толорооччу» Дьокуускайтан Иван Федоров, «Бастыҥ толорооччу» Абаҕаттан Ньургун Эверстов, Мэҥэ Хаҥалас Аллараа Бэстээҕиттэн Дьулустан Аргунов, «Бастыҥ дуэт» Сунтаартан Анна Чойнова, Юлия Филиппова, «Ааптар бастыҥ ырыата» Алдантан Олег Плачинта, «Күрэхтэһии эрэлэ» Амматтан Максим Малыкайцев ааттаннылар.
Дмитрий Емельянов дьиэ кэргэнэ Амматтан Дмитрий Наумовка гитара бэлэхтээтэ. Амма мелодистара Мээндигиттэн Егор Поповка, улуустааҕы култуура уонна норуот айымньытын салалтата Амматтан Ирина Васильеваҕа, култуура тэрилтэлэрэ Сулҕаччыттан Олеся Стручковаҕа, Амма 1№-дээх орто оскуолата Амматтан Екатерина Рыжковаҕа, доҕуһуоллааччы Екатерина Бочкарева, Ф.Ф.Потапов аатынан Амматааҕы норуот айымньытын дьиэтэ Амматтан Александр Черемныхха бэйэлэрин бириистэрин туттардылар.
Дмитрий Спартакович СГУ омук тылын факультетын бүтэрбитэ. Амма орто оскуолалагар ньиэмэс тылын учууталынан, райкомол иккис сэкирэтээринэн, оройуон баһылыгын социальнай-экономическай боппуруостарга солбуйааччынан, СӨ Президенин иһинэн ийэ буолуу уонна оҕо аймах кэмитиэтигэр үлэлээбитэ.
Элбэх ырыа ааптара, толорооччута, ырыа фестивалларын лауреата Германияттан Саха сиригэр киинэ уста кэлбит ДЕФА киинэ хампаанньатыгар тылбаасчыт быһыытынан эмиэ көмө буолбута.
Наталья Прокопьевна уонна Дмитрий Спартакович түөрт оҕону төрөппүттэрэ. Улахан кыыстара Оксана улуус дьаһалтатын кадрга отделын начаалынньыгынан үлэлиир.
Иккис оҕолоро Олег Аммаҕа ийэтинээн олороллор. Андрей Дьокуускай куорат оскуолатын историяҕа учуутала, Екатерина улуустааҕы кииннэммит балыыһа фтизиатр бырааһа. Ити курдук Дмитрий Емельянов аатын ааттатар ыччаттаах. Бу сайын Дима диэн ааттаах хос сиэн күн сирин көрөн дьиэ кэргэн үөрүүлэрэ улахан.
Оксана Емельянова, мелодист кыыһа:
«Аҕабытыгар анаммыт күрэхтэһии быйыл интэриниэт ситиминэн ыытыллыбыта төттөрүтүн элбэх толорооччуну түмтэ. Өрөспүүбүлүкэбит ыраах улуустарыттан оҕотуттан аҕа саастаахтарыгар тиийэ кыттыбыттарыттан олус үөрдүбүт. Бу тэрээһиҥҥэ аҕам оҕо сааһын, Комсомольскай уулуссатыгар ыаллыы олорбут, Амма орто оскуолатын 1972 сылга бүтэрбит, университеты 1981 сыллаахха бүтэрбит бары доҕотторугар, куоракка олорор биир идэлээхтэригэр, доҕотторугар, «Сэргэлээх уоттарыгар» ыллаабыт ансаамбылыгар, учууталлаабыт кэлэктиибигэр, улуус дьаһалтатыгар, култуура салалтатыгар уонна тэрилтэлэригэр, улуус мелодистарыгар онтон да атын күндү дьоммутугар күүс-көмө буолбуттарыгар улахан махталбытын тириэрдэбит».
Алексей Егоров-Өркөн, дьүүллүүр сүбэ бэрэссэдээтэлэ:
«Кэнники кэмҥэ тыыннаах дорҕооҥҥо, доҕуһуолга улахан болҕомто ууруллар буолла Бу күрэхтэһиигэ элбэх ырыаһыт кыттыбытын да иһин барыларын сэҥээрэн, интэриэһиргээн көрдүбүт, үчүгэй толорооччулар баалларыттан үөрдүбүт. Гитаранан уонна атын да музыка инструменнарынан киэргэтии эмиэ баар. Сыанаҕа толоруу култуурата, маастарыстыбата үрдээн иһэрэ көстөр. Кыттааччылар аҥаардара эдэр толорооччулар буоланнар инникигэ эрэл эмиэ улаатар. Таһымнаах элбэх ырыаһыт кыттыбытынан сыаналыырга да уустук буолла. Ол эрээри дьүүллүүр сүбэ тус-туһунан олорон үлэлээбит бэйэбит сыанабылбытынан кыайыылаахтар быһаарылыннылар. Электроннай музыка сайдыбыт кэмигэр тыыннаах толорууну дьоҥҥо-сэргэҕэ тарҕатар маннык күрэхтэһиилэр ыытылла туралларыгар, олохпут аргыһа, доҕоро буолар куруук үтүөҕэ, сырдыкка тардар кэрэ ырыалар ыллана, айылла туралларыгар баҕарабын».
