Чурапчыттан ХОТУУНА “Мигалкин самаан сайына” бэстибээлгэ кыайыыны ситистэ
Бүгүн о.э бэс ыйын 6 күнүгэр Уус Алдан улууһугар “Мигалкин самаан сайына” диэн литэрэтиирэ бэстибээлэ киэҥ далааһыннаахтык ыытылынна.
Бэстибээл өрөгөйдөөх Улуу Кыайыы 80 уонна Саха суругунан литэрэтиирэтэ төрүттэммитэ 125 сылларыгар ананна.
Тэрийээччилэр уонна кыттааччылар бэс ыйын 6 күнүгэр Чараҥ сэлиэнньэтигэр Нэлээн диэн кэрэ айылҕалаах сиргэ муһуннулар.
Бэстибээли СӨ Суруйааччыларын ассоциацията, култуура улуустааҕы управлениета, Уус Алдан улууһун Киин бибилэтиэкэтэ, Сэһэн Ардьакыап аатынан устуоруйа-кыраайы үөрэтэр түмэл, “Мүрү саһарҕата” хаһыат эрэдээксийэтэ, Мүрү, I Хоро уонна II Лөгөй нэһилиэктэр дьаһалталара, “Уһуктуу” литература түмсүүтэ тэрийэн ыыттылар.
Тэрийээччилэр иһитиннэрбиттэринэн, бэстибээл Саха сирин аныгы литэрэтиирэтин сайыннарарга итиэннэ саҥа талааннары арыйарга, Саха сирин суруйааччылара литэрэтиирэҕэ бииргэ үлэлэһиилэрин бөҕөргөтөргө, Саха Өрөспүүбүлүкэтин норуодунай суруйааччыта Иван Васильевич Мигалкин олоҕун уонна айар үлэтин нэһилиэнньэ киэҥ араҥатыгар сырдатарга туһуланна.
Киэҥ далааһыннаах тэрээһин балаһыанньатын быһыытынан, кыттааччылар Иван Мигалкин хоһооннорун өйтөн дорҕоонноохтук ааҕан иһитиннэрдилэр, эдэр ааптардарга поэзия күрэҕэ, прозаиктарга “Мин – суруйааччыбын” куонкурус, бэриллибит тиэмэҕэ тута хоһоон суруйууга куонкурус буолла. Ону сэргэ литэрэтиирэ улуустааҕы түмсүүлэрин эҕэрдэлэрэ, суруйааччылар автограф-сиэссийэлэрэ, кинигэ атыыта кыттааччылар уонна ыалдьыттар болҕомтолорун ылыан ылла.
Биһиги улууспутуттан СӨ суруйааччыларын Сойууһун чилиэнэ, элбэх кинигэ ааптара, “Чурапчы” литэрэтииринэй түмсүү салайааччыта, СӨ култууратын туйгуна Римма Иннокентьевна Корякина-ХОТУУНА тиийэн икки түһүмэххэ кыттыыны ылан, “Мин суруйааччыбын” уус-уран айымньыны айыы күрэҕэр кылаан кыайыылааҕынан ону таһынан “Дорҕоонноох Далбар Хотун” анал ааты ылары ситистэ. Кыайыылаахха Сэмэн Ноҕоруодап аатынан “Айар” кинигэ кыһатыттан уонна миэбэл маҕаһыыныттан сэртэпикээттэри туттардылар.
