Дмитрий Апросимов 90 сааһыгар
Кулун тутар 22 күнүгэр эбэҥки дэгиттэр талааннаах бэйиэтэ, сэһэнньитэ, уруһуйдьута, фольклориһа Дмитрий Нестерович Апросимов (1929-1983) 90 сыллаах юбилейынан “Элбэх ыччатым ааппын үйэтитэр...” ахтыы киэһэтэ буолан ааста.
Ааҕааччыларга поэт Саргылаана Гольдерова-Саргы Куо дьүһүйүүтүн билиһиннэрэбит.
Иэйии кыымын аал уоттуу күөдьүтэн
Эбэҥки норуотун уһулуччулаах уола, бэйиэт, ойууһут, сээркээн сэһэнньит Дмитрий Нестерович Апросимов төрөөбүтэ 90 сылыгар анаммыт дьоро киэһэ Национальнай библиотека историческай саалатыгар саха, эбэҥки дьонун тоҕуорутан, торҕо күөх санаа эйгэтинэн чэлгийэн, истиҥ, иһирэх иэйии кыымын аал уоттуу күөдьүтэн алыастанан ааста.
|
Олус үчүгэй ахтыы киэһэтэ сэргэх да сэһэн, кэпсээн эйгэтинэн Сиэдэрэй да ис хоһооннонон Айымньы курдук айыллан, Аман өс алгыһынан саҕыллан, Сахалыы тылынан тыргыллан, эбэҥкилии кутунан кутуллан Чулуу киһибит чороон кута чочуллан, Саҥаттан саҥалыы таҥыллан-арыллан таҕыста! |
Кэрэ киһибит - бэйиэппит Дмитрий Апросимов кэлэр кэмҥэ - билиҥҥигэ кэһии буолан кэлбит хоһооно-тойуга, номоҕо, олоҥхото аны да дьоҥҥо-сэргэҕэ, оҕоҕо-ыччакка иһиллэ туруохтун! Киниэхэ анаммыт алгыстаах түһүлгэ, анабыл айымньы айылла туруохтун!
Үйэлээх кинигэ да буолан айбыта-туппута айыы дьонугар тиийэ, тиксэ туруохтун!
Сээркээн сэһэн олоҕо сэһэргэнэ турдун! Үрдүүр, сырдыыр,тэнийэр, чэлгийэр олох буолан туругуруохтун!
|
Удьуор утум салҕаннын! Айар кутун Куралай кустуга Далай халлаан иэнин Далааһыннаахтык куустун! Киһи аймаҕы Сирдиин халлаанныын Айыы ситимниир Далаһа буолан Куппут куйаарыгар Суһумнуу турдун! |
