Литературная Якутия


 
08.09.2020
 
М. Н. Бысыина,
газета «Таатта»

ДЬОХСОҔОҤҤО ӨКСӨКҮЛЭЭХ ӨЛӨКСӨЙГӨ АНАММЫТ ИСКИБИЭР АҺЫЛЫННА

Дьохсоҕоҥҥо киинэ түспүт, уран тыл аҕата, саха норуотун иннигэр уктар биир бастыҥ чаҕылхай суруйааччыбыт, бөлүһүөкпүт А. Е. Кулаковскай – Өксөкүлээх Өлөксөй буолар. Бүгүн көмүс күһүн биир кэрэ күнүгэр дьоһун Дьохсоҕон нэһилиэгэр умнуллубат түгэн тосхойдо. Ол курдук сүгүрүйэр киһибитигэр Өксөкүлээх Өлөксөйгө аналлаах искибиэр аһыллыыта үөрүүлээх түгэҥҥэ ааста.

 

Искибиэр аһыллыытын СӨ култуураҕа үтүөлээх үлэһитэ, оһуохайдьыта А.Н.Попов алгыс тылынан айхаллаан аста, кыһыл лиэнтэни быһыы умнуллубат түгэнэ тигистэ: улуус Аҕа Баһылыгар М.М.Соровка, үөрэх салаатын исписэлииһигэр Н.Д.Осиповаҕа, олохтоох баһылыкка П.Е.Захаровка, оскуола үөрэнээччитигэр Эльза Саввинаҕа уонна оскуола дириэктэригэр В.Д.Петроваҕа.

 

Эҕэрдэ тылыгар Михаил Соров Таатта улууһугар тыл, култуура күүскэ сайдыбыт түөлбэтэ буоларын тоһоҕолоото, искибиэр нэһилиэк биир бүччүм, сынньанар, сэһэргэһэр миэстэтинэн буолуоҕа диэтэ.

Дириэктэр Василиса Петрова наҕараадалары туттарда “Дьохсоҕон нэһилиэгэр үөрэх сайдыытыгар кылаатын иһин” бэлиэлэри бэтэрээн учууталларга: С.И.Егороваҕа, Г.К.Давыдоваҕа, “РФ үүнэр көлүөнэтин иитиигэ уонна үөрэтиигэ Бочуоттаах үлэһит” анал аат бэлиэтин Т.Л.Поповаҕа, Приморьетааҕы сельхозакадемия Махтал суругун “АгроНТИ-2019” күрэҕин финалыгар кыттыбыттарын иһин Нь.М.Лебедеваҕа, В.Д.Петроваҕа туттарда. Быйыл улууска ЕГЭ хамыыһыйатыгар үтүө суобастаахтык үлэлээбит Я.И.Сивцеваҕа улуус үөрэҕин Махтал суругунан наҕараадалаата.

 

Нэһилиэк Аҕа Баһылыга Петр Егорович Захаров искибиэр тутуутун билиһиннэрдэ. Нэһилиэккэ үс сыллаах тупсаҕайдык туттан олоруу былаанынан Өксөкүлээх Өлөксөй искибиэрин тутуу былаана олоххо киирэн түмүктэннэ. Искибиэр тутуутун үбэ СӨ олох-дьаһах коммунальнай хаһаайыстыбатын министиэристибэтин Гранынан үбүлэннэ. Тутуу уопсай суумата 1 мөлүйүөн 896 тыһыынча буолар, ол иһигэр 225.000 олохтоох үп-харчы (бюджет) кыттыгас үп быһыытынан киирбитэ. Искибиэри тутууну СК “Баланс” тэрилтэ үлэтин ыытан тутта. Онон Өксөкүлээх сыдьааннара улуу киһи аатын үйэтитэр, ааттатар искибиэрдэннибит диэн үөрэн туран ыалдьыттары эҕэрдэлээтилэр.

Кулаковскайдар аймахтар ааттарыттан Р.Р.Кулаковская, кэргэнэ Г.Г.Дарбасов, А.Р.Кулаковскай-Дьэҥкир: «Дьохсоҕон оскуолата Өксөкүлээх Өлөксөй аатын сүгэринэн искибиэр оҥоһуллубута улахан суолталаах, манна киниэхэ анаан уруоктары, көрүүлэри ыытыахтара, онон барыгытыгар махталбытын тиэрдэбит», – дэстилэр.

Л.П.Слепцова оскуолаҕа бастакынан омук тылын үөрэтэн 5 сыл үлэлээбитин истиҥ тылларынан кэпсээтэ уонна Өксөкүлээх айымньыларын ааҕарга, ырытарга сүбэлээтэ. Л.П.Романов, Оонньуулаах Уйбаан хос сиэнэ сыл аайы туттарар истипиэндьийэтин быйыл оскуоланы бүтэрбит Милана Васильеваҕа туттарда уонна маннык улуу Өксөкүлээҕи аатын өрө тутаргыт, үөрэтэргит – бу саха омук кэскилэ диэн бэлиэтээтэ. Онон Өксөкүлээх курдук олоруохха, үөрэниэххэ, айыахха, тутуохха диэн өйдөбүл үөскээтэ.

 

Салгыы бэтэрээн учуутал Л.И.Саввина бу күннэргэ хорсун буойун, улахан Учуутал, кэрэспэдьиэн аҕатыгар И.А.Вырдылиҥҥа анаан таһаарбыт “Үйэлэргэ сүппэт үтүө аат” диэн кинигэтин олохтоох библиотекаҕа Г.Н.Другинаҕа, оскуола дириэктэригэр В.Д.Петроваҕа, Ильмень күөл кыргыһыытыгар иитэр-үөрэтэр үгүс үлэни И.А.Вырдылин ыыппытын иһин Т.Л.Поповаҕа бэлэхтээтилэр. Оскуола мецената, бастакы нэһилиэк Аҕа Баһылыга, Алампаны үйэтитээччи М.Л.Архипов, нэһилиэктэн улуус дьокутаата В.А.Охотин үөрүүлэрин үллэһиннилэр.

 

Чаҕыл күн анныгар искибиэргэ бастакынан “Өксөкүлээҕи Уруйдуубут” хоһоону оскуола үөрэнээччилэрэ, ыччат доргуччу ааҕан доллоһуттулар.

Нэһилиэк убаастанар олохтооҕо В.П.Харайданова Өксөкүлээххэ анабыл хоһоонун аахпыта истээччилэр эттэрин сааһынан киирэн дьырылытта.

Түмүккэ А.Н.Попов Өксөкүлээххэ анаан оһуохайдаан көтүттэ, дьон-сэргэ сүргэтэ көтөҕүлүннэ. М.И.Саввин көҕүлээһининэн Кулаковскайдар аймах, үөрэнээччилэр, олохтоохтук мас олортулар.

Искибиэр хаба ортотугар Өксөкүлээх Өлөксөй бүүһэ туруоруллубут, кэккэлии искибиэргэ кэлбит киһи тупсаҕай ыскамыайкаҕа олорон, пантаан ыһар уутун кэрэ көстүүтүнэн дуоһуйууну ылыаҕа. Өссө күһүҥҥү нуһараҥ киэһэлэргэ элэктэриичистибэ уоттара сырдаталларынан эдэр да, эмэн да дьон дууһаларын уоскутан искибиэр устун хаамыахтара, санааларын атастаһыахтара, сайыҥҥы намыын киэһэлэргэ астына сэһэргэһэн, үөрэн-көтөн ааһыахтара, сааскы чаҕылхай күн уотугар төрөөбүт түөлбэлэрин сэҥээрэ көрөн күүлэйдиэхтэрэ. Өксөкүлээх Өлөксөй төрөөбүт күнүгэр аналлаах тэрээһиннэри, араас ийэ тыл сүмэтинэн ааҕыылары да ыытыахтарын сөп.

 

Онон Дьохсоҕон олохтоохторо билиҥҥи сайдыылаах кэмҥэ дьон-сэргэ тоҕуоруһар бэлиэ миэстэлэннилэр, ытык сиргэ улуу А.Е.Кулаковскайга-Өксөкүлээх Өлөксөйгө сүгүрүйүөхтэрэ, санаан ааһыахтара, сибэкки дьөрбөтүн ууруохтара.

Источник: «Ulus.media»