Литературная Якутия


 
11.07.2019
 
Аграфена КУЗЬМИНА

Поэт Гаврил Андросов Казахстаҥҥа Лев Гумилев мэтээлинэн наҕараадаланна

От ыйын 4-5 күннэригэр Казахстан киин куоратыгар Нур-Султаҥҥа “Евразия киин куораттарын суруйааччылара” аан дойдутааҕы форумҥа саха поэта, “Чолбон” сурунаал сүрүн редакторын солбуйааччы Гаврил Андросов аан дойдуга биллэр учуонай, суруйааччы, историк, философ, географ, публицист Лев Гумилев мэтээлин тутта.

 

Бу тэрээһини Казахстан Суруйааччыларын сойууһа уонна Нур-Султан куорат акиматын (мэриятын) культураҕа уонна спорка салаата тэрийэн ыыттылар. Быйылгы форум “Аан дойду литературата уонна стереотип кэһиллиитэ” диэн ааттаах буолла. Манна барыта сүүрбэччэ дойду, ол иһигэр Испания, Египет, Холбоһуктаах араб эмираттарын, Иран, Турция, Монголия, Индия, Россия, бэрэстэбиитэллэрэ муһуннулар. Россияттан Санкт-Петербург, Татарстан, Башкортостан уонна Саха сирин поэттара, суруйааччылара кытыннылар. Форум үөрүүлээх арыллыытын Казахстан суруйааччыларын сойууһун бэрэссэдээтэлэ, народнай поэт Улугбек Есдаулет ыытта. Манна президент көмөлөһөөччүтэ Максат Скаков, культура уонна спорт миниистирэ Актоты Райымкулова, Нур-Султан куорат акима Алтай Кульгинов, аан дойду аатырбыт казах народнай суруйааччыта, Казахстан Үлэҕэ Геройа Олжас Сулейменов, о.д.а. эҕэрдэ тылларын эттилэр.

 

“Билигин судаарыстыба литературата суох экономика, политика, культура барыта тохтоон хаалыаҕын, бу эйгэни сайыннарбат судаарыстыба инникитэ кэрэгэй буолуоҕун өйдөөн эрэр. Мин санаабар, бу Казахстаҥҥа эрэ буолбакка отучча сыллааҕыта бэйэлэрэ туспа судаарыстыба буолбут өрөспүүбүлүкэлэргэ инники күөҥҥэ сылдьар боппуруос. Онон бу форум атын дойдуларга холобур буолуоҕар эрэнэбин, литература сайдыытыгар маннык тэрээһин улахан оруоллаах дии саныыбын”, – диэн бэлиэтиир Казахстан биллиилээх суруйааччыта Олжас Сулейменов.

 

Саха сирин Суруйааччыларын сойууһуттан бу форумҥа кыттыбыт Россия Суруйааччыларын сойууһун бырабылыанньатын сэкирэтээрэ Гаврил Андросов “Поэзия уонна цивилизация” диэн секцияҕа кытынна. Саха литературатын, норуоттар, литературалар доҕордоһууларын туһунан тыл этэн туран, Казахстан Суруйааччыларын сойууһун бэрэссэдээтэлин солбуйааччы, “Дарын” ыччат судаарыстыбаннай бириэмийэтин лауреата, поэт Акберен Елгезекка Саха сирин Суруйааччыларын сойууһун эҕэрдэтин туттарда.

“Бу форуму биһиги биллэр суруйааччыларбыт Николай Лугинов, Наталья Харлампьева, Урсун үөлээннээхтэрэ народнай поэт Улугбек Есдаулет бэрэссэдээтэллээх Казахстан суруйааччыларын сойууһун саҥа салалтата өрөспүүбүлүкэ салалтатын кытта быһаччы үлэлэһэн тэрийдэ. Улукбек Есдаулет – саха народнай поэта Наталья Харлампьева тылбаасчыта, кини Саха сиригэр Өксөкүлээх Өлөксөй аатынан судаарыстыбаннай бириэмийэ лауреата, Казахстан суруйааччыларын сойууһун бырабылыанньатын сэкирэтээрэ Калаубек Турсункуловтыын кэлэ сылдьыбыт. Онон саха суруйааччыларын кытта ситими сөргүтэргэ баҕалааҕын эппитэ. Форум координатора суруйааччылар сойуустарын Астанаатааҕы филиалын дириэктэрэ, тыл наукатын доктора, “Дарын” ыччат судаарыстыбаннай бириэмийэтин лауреата Даулеткерей Капулы саха поэзиятын, саха быһаҕын, булдун кэрэхсиир аныгы сүһүөх казах поэта”, – диэн бэлиэтиир кини.

 

Форум чэрчитинэн Л.Н. Гумилев аатынан Евразиятааҕы национальнай университет ректора Ерлан Сыдыков кыттааччылары кытары анаан көрүстэ. Көрсүһүү кэмигэр наука уонна үөрэх эйгэтигэр норуоттар икки ардыларынааҕы сибээскэ өҥөтүн иһин Гаврил Андросовка Лев Гумилев мэтээлин туттарда. Маннык мэтээли форум өссө үс кыттааччыта ылла.

Санатан эттэххэ, саха уонна казах суруйааччыларын доҕордоһуулара ыраахтан силис-мутук тардар. Кэрэхсэбиллээҕэ баар, ону билиҥҥи көлүөнэ салҕаан эрэр. Ол көлүөнэлэр алтыһыыларын, утумнааһыны кытары ыкса сибээстээх. Гаврил Гаврильевич айымньыларын Казахстан ааҕааччылара номнуо билсэн тураллар. Кини хоһооннорун “Самурык” диэн литературнай сурунаалын эппиэттиир сэкирэтээрэ Серикжан Кажытай казахтыы тылбаастаан таһаарбыта.

– Казах интеллигенцията Казах Суруйааччыларын сойууһун бэрэссэдээтэлэ Ильяс Джансугуровтыын Москваҕа бииргэ үөрэммит саха народнай поэта Эллэй, 1930-с сылларга Чимкент куоракка айар командировкаҕа олорбут Эрилик Эристиин саҕаттан саха суруйааччыларын үчүгэйдик билэллэр. Онуоха саха, казах, кыргыз омуктар судаарыстыбаннай деятеллэрэ Максим Аммосов аата биир тулааһынынан буолар. Кэлин казах уонна саха суруйааччыларын доҕордоһууларын бөҕөргөппүт дьонунан саха народнай поэта Семен Даниловы уонна Калаубек Турсункуловы ааттыах кэриҥнээхпит. Мин бу сырыым аҕа көлүөнэ суруйааччылар ситимнэрин сөргүтэргэ, аныгы кэмҥэ сөп түбэһиннэрэн бөҕөргөтөргө олук уурдар уонна биһиги дойдуларбыт Россиялаах Казахстан тэрийэр Евразиятааҕы холбоһуктара үөскүүрүгэр тирэх буоллар диэн баҕа санаалаахпын, – диэн бэлиэтиир түмүккэ Гаврил Андросов.

Источник: Сахапечать