«Саха суруйааччылара» Ассоциацияҕа саха тылын уонна кафедратын үбүлүөйүн бэлиэтээтилэр
«Саха суруйааччылара» Ассоциацияҕа СГУ-гар саха тылын уонна кафедрата тэриллибитэ 85 сылыгар анаммыт тэрээһин буолан ааста. Манна саха тылын уонна литературатын салаатыгар ааспыт үйэ 80-с сылларыгар биир кэмҥэ үөрэммиттэр муһуннулар.
Кинилэр ортолоругар тыа сирин оскуолатыгар, култуура араас салаатыгар, суруналыыстыкаҕа, литератураҕа өр кэмҥэ ситиһиилээхтик үлэлээбит култуура, үөрэҕирии туйгуннара, үтүөлээх үлэһиттэрэ бааллар. Мэҥэ Хаҥаластан Төҥүлүтээҕи кыраайы үөрэтэр түмэл дириэктэрэ Иван Тарабукин-Талыман, Уус Маайа улууһун хаһыатын үлэһитэ Евсей Лугинов-Уолан Алдан, Олоҥхо театрын методиһа Виктор Стручков-Дуулаҕа Дьуһаал, Уус Алдан улууһун кыраайы үөрэтэр түмэлин дириэктэрэ Павел Пермяков-Тэлэкэ, Үөһээ Бүлүү улууһугар өр кэмҥэ саха тылын, литературатын учууталынан үлэлээбит педагог Бурхалей Макаров, Саха сиригэр мас-рестлинг федерациятын төрүттэспит, норуоттар икки ардыларынааҕы кылаастаах судьуйа Петр Колодезников, оскуолаҕа саха тылын үөрэтиигэ, оҕолорго аналлаах кинигэлэр ааптардара Максим Ксенофонтов, » Чолбон» литературнай сурунаал үлэһитэ, Саха сирин Суруйааччыларын сойууһун чилиэнэ, үтүөлээх суруналыыс Данил Макеев, биллиилээх суруналыыс, В.В.Никифоров-Күлүмнүүр аатынан судаарыстыбаннай бириэмийэ лауреата Василий Никифоров, Дьааҥы улууһун дьаһалтатын пресс-сулууспатын үлэһитэ Владислав Кривошапкин, биллиилээх суруйааччы, «Көмүөл» кинигэ кыһатын дириэктэрэ, саҥа төрүттэммит «КЭМ» историческай — культурологическай, уус-уран сурунаал сүрүн редактора Борис Павлов-Кэм бэйэлэрин айар үлэлэрин, тустаах дьарыктарын, бэчээккэ тахсыбыт кинигэлэрин тустарынан кэпсээтилэр, билиһиннэрдилэр. Саха тылын, култууратын, литературатын, итэҕэлин, историятын тула бэйэлэрин санааларын, көрүүлэрин үллэһиннилэр.
«Саха суруйааччылара» Ассоциация бэрэссэдээтэлэ Олег Сидоров маннык кэпсэтии, түмсүү саха тылын, култууратын, литературатын, историятын эйгэтигэр үлэлээччилэргэ үтүө дьайыылаах, улахан суолталаах буоларын бэлиэтээтэ уонна кэпсэтиигэ кыттыбыттарга махталын биллэрдэ. Көрсүһүү кыттыылаахтара саха тылын, литературатын, култууратын тускулларынан бииргэ сүбэлэһэн үлэлээһиҥҥэ этиилэри оҥордулар.
